Інфлянты, Лівонія, гістарычная назва зямлі Усходняй Прыбалтыкі (тэрыторыя сучаснай Латвіі і Эстоніі).
У выніку вайны Рэчы Паспалітай са Швецыяй 1600-29 паўднёвая Эстонія і заходняя Латвія захоплены Швецыяй, у складзе Рэчы Паспалітай засталіся толькі 4 інфлянцкія тракты (стараствы): Дынабургскі, Рыжыцкі, Люцынскі, Мерыенгаўзенскі.
Князь Ян Шчэнснавіч Галоўчынскі ў час гэтай вайны на чале ўласнай харугвы ваяваў (1621-1622) у Інфлянтах супраць шведаў.

Іпацьеўскі летапіс, летапісны звод Старажытнай Русі, знойдзены ў ХVІІІ стагоддзі ў  аднайменным манастыры каля Кастрамы.
Складаецца з «Аповесці мінулых гадоў», Кіеўскага і Галіца-Валынскага летапісаў.
Утрымлівае запіс пад 1071 годам аб бітве каля Галацічаска (Галоўчына Бялыніцкага раёна?) паміж войскамі князёў Усяслава полацкага і Яраполка Уладзіміра – валынскага і тураўскага.

Ісаковіч Лука, купец з Галоўчына, аб якім на пачатку XVII стагоддзя, у мытняй кнізе горада Віцебску, зроблен запіс аб дастаўцы на тамашні рынак тавараў.

Іржаўчык, яшчэ адно ўрочышча ў Баранаўцы, дзе раней было балота.
Па берагах яго раслі бярозы і асіны. Восенню лістота на дрэвах чырванела і жаўцела. Гэта каляровая гама адлюстроўвалася ў вадзе, якая набывала іржавы адценак.