Майская Спасаўская (Святая) крынічка
 |
Сакральнае месца.
...Калісьці, як сцвярджае мясцовая легенда, на тым самым месцы, дзе зараз знаходзіцца Майская крыніца, стаяла праваслаўная капліца. Аднойчы нейкі вар’ят падпаліў яе. I як толькі вяскоўцы не змагаліся з агнём, але выратаваць капліцу ім не ўдалося. Якім жа было здзіўленне іх, калі неўзабаве пабачылі, што на ўсходнім вугле былой капліцы з-пад каменя-мура прабівае сабе шлях крынічка. Сяляне расчысцілі пажарышча, выкапалі падмуркавы камень, зрабілі альтанку. У жнівеньскія дні таго ж года яе асвяціў святар, патлумачыўшы людзям, што Гасподзь выбачае нам грахі, клапоціцца пра ўсіх нас, пасылае выратаванне ад бездухоўнасці. 3 таго часу штогод 19 жніўня мясцовыя жыхары прыходзяць да Спасаўскай крыніцы, каб асвяціць яблыкі, грушы. |
 |
Непадалёку ад крыніцы размясціліся старадаўнія могілкі, дзе старажытныя пахаванні абазначаны невялікімі валунамі адвольнай формы, каменнымі крыжамі і пласцінамі. На многіх з іх высечаны таямнічыя знакі. Тут жа знаходзіцца паўтараметровы каменны крыж, які спярэшчаны загадкавымі сімваламі і паасобнымі літарамі кірылічнага алфавіту - крыжы, крыжыкі на розных падстаўках ці пакрытыя дугой, краты, стрэлачкі, трохкутнікі, “ъ”, “ь”, “р”, “и”, “N” і іншыя. |
КРЫНІЦЫ ІНФАРМАЦЫІ:
Завейны, М. Яблычны спас ля Майскай крыніцы / Міхась Завейны // Зара над Друццю. – 2010. – 25 жніўня. – С. 8. Карпечанка, М. Уздоўж стромы... Таямніцы = Unsolved sekrets / Міхась Карпечанка. – Мінск : Выдавецтва В. Хурсік, 2007. – 144 с., іл. Палоннік, Н. Расхініся, заслона часу!.. / Надзея Палоннік // Зара над Друццю. – 2010. – 21 красавіка. – С. 5. |
