Іван Дамінікавіч Луцэвіч (Янка Купала) – класік беларускай літаратуры, паэт-прарок, паэт-грамадзянін, паэт-філосаф, літаратурны крытык, драматург, перакладчык, публіцыст, акадэмік Нацыянальнай акадэміі навук Беларусі.
Творчасць Янкі Купалы ўяўляе сабой сапраўдную энцыклапедыю жыцця беларускага народа. Яго творы параўноўваюць з лепшымі ўзорамі сусветнай літаратуры, ведаюць і любяць ва ўсім свеце. Сачыненні паэта перакладзены на 117 моў.
Памяць аб ім беражліва захоўваецца ў Беларусі ўжо шмат гадоў.
Пра жыццё і творчасць паэта сёння расказваюць у Літаратурным музеі Янкі Купалы ў Мінску, у яго філіялах у Вязанцы, Ляўках, Харужэнцах, Яхімоўшчыне. Імем паэта названы Інстытут мовы і літаратуры Нацыянальнай Акадэміі Навук Беларусі, Гродзенскі дзяржаўны ўніверсітэт, вуліца, парк і станцыя метро ў Мінску, праспект у Гродне, мемарыяльныя запаведнікі ў Вязанцы і Ляўках, ландшафтны заказнік у Акопах.
З 1959 года прысуджаецца Літаратурная прэмія імя Янкі Купалы (з 1965-га яна мае статус дзяржаўнай). Расказаць пра жыццё і творчасць першага народнага паэта Беларусі закліканы Купалаўскія чытанні, якія з цягам часу сталі прафесійным форумам для абмеркавання навуковых дасягненняў і праблем купалазнаўства.