Вёска Запакулле па пісьмовых крыніцах вядома з 17 ст. У 1630 г. сяло, 33 гаспадаркі, у Бялыніцкай воласці Аршанскага павета, шляхецкая ўласнасць. На пачатак 1777 г. пазначана ў ліку населеных месц Магілёўскай акругі Магілёўскай губерніі. У 1785 г. ў складзе маёнтка Бялынічы, 19 двароў, 124 жыхары. Паводле інвентару 1825 г. цэнтр фальварка, у якім 71 дом, 543 жыхары. У1845 г. ў вёсцы 53 двары. Памешчык Мясаедаў меў у 1869 г. ў Бялынічах, вёсках Аксенькавічы, Бярозаўка, Запакулле, Ключкі, Міхалева, Ослік, Пачапок, Рудня, Трылесін – 22092 дзесяціны зямлі, 2 вадзяныя млыны, 2 сукнавальні, крупадзёрку, піцейны дом, дзягцярны, піваварны, вінакурны і цагельны заводы. У 1897 г. ў Бялыніцкай воласці Магілёўскага павета, 116 жыхароў. У 1909 г. 45 двароў. З лютага да кастрычніка 1918 г. акупіравана германскімі войскамі. У 1924 г. 41 двор, 208 жыхароў. У1930 г. арганізаваны калгас «13-ы Кастрычнік». У 1940 г. 40 двароў, 130 жыхароў. З 1941 г. да 29.06.1944 г. акупіравана нямецка-фашысцкімі захопнікамі. 12 вяскоўцаў загінулі на фронце, 8 у партызанскай барацьбе. Паводле перапісу 1970 г. 145 жыхароў. У 1986 г. 98 жыхароў, у складзе саўгаса «Бялынічы» (цэнтр – г.п.Бялынічы), магазін, фельчарска-акушэрскі пункт. У 2002 г. 40 гаспадарак, 88 жыхароў.
Планіровачна складаецца з прамалінейнай шыротнай вуліцы, забудаванай двухбакова драўлянымі сялянскімі хатамі з прысядзібнымі ўчасткамі.

Запакулле : [вёска ў Бялыніцкім раёне] // Гарады і вёскі Беларусі : Магілёўская вобласць : энцыклапедыя : у 8 т. / рэдкалегія: Г.П. Пашкоў [і інш.]. − Мінск, 2008 – Т. 5 : кн. 1. – С. – 361.