У кожнага чалавека, які меў шчасце нарадзіцца на нашай зямлі, абавязкова ёсць свой ласкавы і шчымліва-непаўторны край, які ў шырокім паняцці Радзімы, звычайна, займае звыклае месца. Такі край − гэта заўсёды твой цэлы свет. I як вырастае ён у тваёй душы, як шырыцца і запаланяе цябе ўсяго высакароднай гордасцю, светлай радасцю не толькі адным напамінкам пра сябе, але і выпадковаю згадкаю пра знаёмыя з дзяцінства мясціны.
І той, хто нарадзіўся і вырас ў прыгожым, цудоўным куточку беларускай зямлі пад назвай Бялыніччына, і той, хто пабываў тут выпадкова, назаўсёды захавае ў сэрцы яе непаўторныя краявіды.
Бялыніччына мае багатую і слаўную гісторыю, адметную культурную спадчыну. Электронная база «Радзімая прыдруцкая зямля, часцінка нашай любай Беларусі», створаная Бялыніцкай раённай бібліятэкай, зберагае унікальныя звесткі з гісторыі вёсак, цікавыя факты аб знакамітых земляках, вершы, легенды, паданні Бялыніччыны. Спецыяльны раздзел «Галерэя» прадстаўляе шэраг фотаздымкаў, якія, безумоўна, зацікавяць ўсіх, хто вывучае, альбо мае інтарэс да гісторыі роднага краю.