Вёска Васількі па пісьмовых крыніцах вядома з 18 ст. У 1777 г. вёска ў Магілёўскай акрузе. У 1785 г. ў складзе маёнтка Галоўчын, 42 двары, 254 жыхары. У 1880 г. 53 двары, 361 жыхар. Апрача земляробства частка вяскоўцаў займалася кравецкім промыслам. Памешчык у 1881 г. меў тут 103 дзесяціны зямлі. Паводле перапісу 1897 г. ў Нежкаўскай воласці Магілёўскага павета, 67 двароў, 470 жыхароў, школа граматы, хлебазапасны магазін. Побач быў аднайменны фальварак (5 двароў, 51 жыхар).
У 1908 г. школа граматы ператворана ў земскую, якая размяшчалася ў наёмным памяшканні. У 1909 г. ў вёсцы 68 двароў, 45 жыхароў, у засценку 10 двароў, 56 жыхароў. З лютага да кастрычніка 1918 г. акупіравана германскімі войскамі. Вясной 1924 г. арганізавана меліярацыйнае таварыства «Васількі» (50 чал.). Вяскоўцы разам з жыхарамі суседніх вёсак (26 меліярацыйных таварыстваў) уручную пракапалі канал даўжынёй 9 км, шырынёй 2,5 м. На яго адкрыцці прысутнічаў старшыня Саўнаркома БССР А.Г.Чарвякоў. Меліярацыйнае таварыства «Васількі» ў снежні 1924 г. было ўзнагароджана ордэнам Працоўнага Чырвонага Сцяга БССР за № 1. У 1926 г. 106 двароў, 556 жыхароў. У 1929 г. арганізаваны калгас «Чырвоная зорка».
У Вялікую Айчынную вайну з 02.07.1941 г. да 29.06.1944 г. вёска была акупіравана нямецка-фашысцкімі захопнікамі. 47 вяскоўцаў загінулі на фронце, 10 — у партызанскай барацьбе. У перыяд фашысцкай акупацыі дзейнічала патрыятычнае падполле. На мясцовых могілках магілы радавога С. Л. Буймісцера і лейтэнанта М. І. Вальвачова, якія загінулі ў час Вялікай Айчыннай вайны.
Паводле перапісу 1959 г. – 419 жыхароў, у 1970 г. – 363 жыхары. У 1986 г. – 197 жыхароў у складзе калгаса «Наша перамога» (цэнтр — в. Галоўчын), магазін і клуб. У 2002 г. – 75 гаспадарак, 138 жыхароў.
Рака падзяляе вёску на паўднёвыя і паўночныя часткі. Вуліцы арыентаваны шыротна. Забудова двухбаковая, шчыльная. Жылыя дамы драўляныя, індывідуальнага тыпу, з прысядзібнымі ўчасткамі.

Васількі // Бялыніччына : Краязн. энцыкл. даведнік / Уклад. М. Карпечанка. – Мінск : Выд. В. Хурсік, 2011. – С. 32.
Васількі : [вёска ў Бялыніцкім раёне] // Гарады і вёскі Беларусі : Магілёўская вобласць : энцыклапедыя : у 8 т. / рэдкалегія : Г. П. Пашкоў [і інш.]. − Мінск, 2008. – Т. 5 : кн. 1. – С. 345.