СТЭФАНОВА
Сястра Хатыні – Стэфанова −
Не адбудуецца нанова.
На вулках, сонейкам прагрэтых,
Не зазвініць дзіцячы смех.
Не знойдуць птушкі ў вёсцы гэтай
Для гнёзд сваіх прыветных стрэх.
Гады з вятрамі зруйнавалі
Сядзіб былых усе сляды.
Ды толькі Стэфанова з намі
Успамінам колішняй бяды.
І пасівелая магіла,
І строгі помнік землякам,
І вочы мёртвыя з жорсткай сілай
Глядзяць, здаецца, у сэрцы нам.
Няхай частей. Часцей, як можна
Напамінаюць нам яны,
Што свет такі бездапаможны
Перад абразінай вайны.
Што вёска з назвай Стэфанова
Не абудуецца нанова.

Радоўскі, М. Стэфанова : верш / Міхась Радоўскі // Малой радзімы цёплы свет : вершы / ДУК «Бялыніцкая цэнтралізаванная бібліятэчная сетка», Аддзел абслугоўвання і інфармацыі ; [складальнік Р. Г. Гапеева; рэдактар Р.Г. Гапеева; адказны за выпуск І.А. Коннава]. – Бялынічы : Бялыніцкая цэнтральная раённая бібліятэка, 2013. – С. 9.

СТЭФАНОВА
Шукаюць вёску Стэфанова
Аблокі сорак два гады…
Дзядок з касой сядзіць на дровах,
Стаяла цётка ля грады.
Хлапчук выцягваў з пальца стрэмку,
Над дошкай з гэблікам карпеў…
Дзяліла маці дзецям семкі
І бурачынне несла ў хлеў.
Пад плот адцягвала балею
Бабуля – светлае чало…
Да хат зіхоткаю лілеяй
З усходу сонейка плыло…
Прымрою вёску Стэфанова,
Хоць не была ў ёй да вайны…
Бур`ян глухі шуміць за ровам,
Там сховы ладзяць кажаны.
(Стэфанова − вёска Бялыніцкага раёна, спаленая у гады Вялікай Айчынай вайны разам з жыхарамі).

СТЭФАНОВА
Сястра Хатыні, −
у родным краі
Сям`ёю дружнаю
жыла…
цяпер тут помнік,
прасак стыне.
Травой сцяжына
зарасла.
Жывыя кветкі
ускладаю
закатаваным
землякам
І ў кожным прозвішчы
чытаю
праклён
тым карнікам-звярам.
Зялёным гоманам
бярозка
ахвяры кліча
з небыцця…
Вятры шумяць
на месцы вёскі,
бы мёртвых клічуць
да жыцця.

Серыкаў, У. Стэфанова : верш / Уладзімір Серыкаў // Нязгаснае сонца : вершы / ДУК «Бялыніцкая цэнтралізаваная бібліятэчная сетка», Аддзел абслугоўвання і інфармацыі ; [складальнік Г. А. Лапо; рэдактар Р. Г. Гапеева; адказны за выпуск І. А. Коннава]. – Бялынічы : Бялыніцкая цэнтральная раённая бібліятэка 2013. − С. 40.